மறுசீரமைக்கப்பட்ட கடன் கொடுப்பனவுகள் குறித்து சுவஸ்திகா அருளிங்கம் தவறாகக் குறிப்பிடுகின்றார்

உண்மைச் சரிபார்ப்புகளும்

கடன் மறுசீரமைப்பு ஒப்பந்தத்தின் கீழ் இலங்கையின் மீள்கொடுப்பனவுகள் மறுசீரமைப்பிற்கு முன்பு இருந்ததை விட அதிகமாக உள்ளதாக 2024 பொதுத் தேர்தலில் போட்டியிட்ட மக்கள் போராட்ட முன்னணியின் வேட்பாளர் சுவஸ்திகா அருளிங்கம் தெரிவிக்கின்றார்.

இறுதி மறுசீரமைப்பு ஒப்பந்தத்திற்கு முன்னதாக, முறி உடமையாளர்களுடனான செப்டெம்பர் கடன் மறுசீரமைப்பு ஒப்பந்தத்தில் குறிப்பிடப்பட்ட உலகளாவிய விருப்பத்தை (Global option) (வலைப்பக்கத்தில் உள்ள மேலதிகக் குறிப்பைப் பார்க்கவும்) ஒட்டுமொத்த கடன் மறுசீரமைப்பும் பின்பற்றுகின்றது என்று அனுமானிக்கும் கணக்கீடுகளை இந்தக் கூற்று அடிப்படையாகக் கொண்டுள்ளது. அதன் பிரகாரம் இந்தக் கூற்றைச் சரிபார்க்க, நிதி அமைச்சினால் வெளியிடப்பட்ட இலங்கைக்கும் நாட்டிற்கான பன்னாட்டு நாணய முறி (ISB) உடமையாளர்களுக்கும் இடையேயான செப்டெம்பர் கடன் மறுசீரமைப்பு ஒப்பந்தத்தை FactCheck.lk ஆராய்ந்ததுடன் உலகளாவிய விருப்பத்தையும் மதிப்பிட்டது.

ஒரு நாடு அதன் கடன் சுமையைத் திறன்படக் குறைத்துள்ளதா என்பதை இரண்டு முக்கிய அளவீடுகள் தீர்மானிக்கின்றன:

1. மூலதன மீள்கொடுப்பனவு குறைப்பு: மீளச் செலுத்த வேண்டிய மொத்த மூலதனத் தொகை குறைந்துள்ளதா?
2. வட்டிக் குறைப்பு: ஆண்டுக்கான வட்டிக் கொடுப்பனவுகளுக்கான வட்டி விகிதம் குறைந்துள்ளதா?

இலங்கையைப் பொறுத்தவரை, செப்டெம்பர் கடன் மறுசீரமைப்பு ஒப்பந்தத்தால் இரண்டு அளவீடுகளும் குறைந்துள்ளன.

முதலாவது, மூலதன மீள்கொடுப்பனவு அசல் தொகையுடன் ஒப்பிடும்போது குறைந்துள்ளது – ஐ.அ.டொ 12,250 மில்லியனில் இருந்து ஐ.அ.டொ 12,281 மில்லியனாக (2.1% குறைந்துள்ளது) குறைந்துள்ளது. இரண்டாவது, பெயரளவு வருடாந்தச் சராசரி வட்டிக் கொடுப்பனவுகள் ஐ.அ.டொ 500 மில்லியனில் இருந்து ஐ.அ.டொ 393 மில்லியனாக (21.4% குறைப்பு) குறைந்துள்ளது. வட்டிக் குறைப்பைச் சரியாகக் குறிப்பிடுவதானால், சராசரி நிறையேற்றப்பட்ட கூப்பன் (வட்டி விகிதம்) அசல் மூலதனத்தில் 6.7 சதவீதத்தில் இருந்து ஒப்புக்கொள்ளப்பட்ட மறுசீரமைக்கப்பட்ட (குறைந்த) மூலதனத்தில் 4 சதவீதமாகக் குறைந்துள்ளது.

மேலதிகமாக, மீள்கொடுப்பனவு கால அளவு 8 ஆண்டுகளில் இருந்து 16 ஆண்டுகளாக நீட்டிக்கப்பட்டுள்ளது. இது மீள்கொடுப்பனவு காலத்தை இரட்டிப்பாகியுள்ளது.

நீட்டிக்கப்பட்ட மீள்கொடுப்பனவு காலப்பகுதிக்கான வட்டிக் கொடுப்பனவுகளை, குறைவான அசல் மீள்கொடுப்பனவு காலப்பகுதிக்கான வட்டிக் கொடுப்பனவுகளுடன் ஒப்பிடுவதே அருளிங்கம் செய்யும் தவறு ஆகும்.

8 ஆண்டுகளில் செலுத்துவதை விட 16 ஆண்டுகளில் வட்டி அதிகமாகச் செலுத்தப்படும் என்ற போதிலும், கடன் பொறுப்புகள் குறையவில்லை என்ற கூற்றுக்கு இது ஆதரவளிக்கவில்லை. மூலதனம் ஓரளவு குறைந்துள்ளதுடன், மறுசீரமைப்பிற்கு முன்னரான அசல் கடன் மீதான வட்டி விகிதத்துடன் ஒப்பிடும்போது வட்டி விகிதம் குறிப்பிடத்தக்க அளவு குறைந்துள்ளது.

எனவே நாங்கள் அருளிங்கத்தின் கூற்றைத் தவறானது என வகைப்படுத்துகின்றோம்.

---

சுவஸ்திகா அருளிங்கத்திற்கு FactCheck.lk பதிலளிக்கின்றது: எந்த வித்தியாசமும் இன்றி கருத்து வேறுபாடு

ஏப்ரல் 2, 2025 அன்று டெய்லி FT பத்திரிகையில் வெளியான சுவஸ்திகா அருளிங்கத்தின் உத்தியோகபூர்வப் பதிலில் எழுப்பப்பட்ட சர்ச்சைகளுக்கு இது பதிலளிக்கின்றது (இங்கே பார்க்கவும்). தனது சொந்த மாற்றுக் கணக்கீடுகளை சமூக ஊடகங்களில் வெளியிட்டு எங்கள் உண்மைச் சரிபார்ப்பு குறித்து கேள்வி எழுப்பிய தனுஷ ஹிகான் பத்திரணவின் (இங்கே சொடுக்கவும்) கணக்கீடுகளை அருளிங்கம் தனது பதிலில் மேற்கோள் காட்டுகின்றார்.

FactCheck.lk, வெரிட்டே ரிசேர்ச் அல்லது அதன் ஊழியர்கள் மீது அருளிங்கமோ பத்திரணவோ முன்னெடுத்த தனிப்பட்ட தாக்குதல்கள் மற்றும் தலைப்பிற்கு அப்பாற்பட்ட கருத்துகளுக்கு நாங்கள் பதிலளிக்கவில்லை.

அவரது பதிலில், கடன் மறுசீரமைப்பு ஒப்பந்தம் “இலங்கைக்குப் பேரழிவை ஏற்படுத்தியது” என பரந்த கூற்றைவலியுறுத்துவதன் மூலம் தொடங்குகின்றார். மறுசீரமைப்பு ஒப்பந்தத்தின் கீழ் இலங்கையின் கடன் மீள்கொடுப்பனவுநிபந்தனைகள் மறுசீரமைப்புக்கு முன்பு இருந்ததை விட மோசமாக உள்ளன என்று வாதிட்ட ஒரு குறிப்பிட்ட கூற்றையே  நாங்கள் உண்மைச் சரிபார்ப்பிற்கு உட்படுத்தியிருந்தோம். அவருடைய முழுமையான அறிக்கையை இங்கே (4.58 முதல்) காணலாம்: https://www.facebook.com/watch/?v=2925672277609015

அருளிங்கத்தின் கூற்றை மதிப்பாய்வு செய்த FactCheck.lk மறுசீரமைக்கப்பட்ட ஒப்பந்தத்தின் பின்னர் கடனுக்கான மூலதன மீள்கொடுப்பனவு மற்றும் வட்டி விகிதம் ஆகிய இரண்டுமே அதற்கு முன்னர் இருந்த ஒப்பந்தத்தின் நிபந்தனைகளுடன் ஒப்பிடும்போது குறைந்துள்ளதைக் கண்டறிந்தது. இதன் காரணமாக அருளிங்கத்தின் கூற்றை FactCheck.lk தவறானது என மதிப்பிட்டது.

பத்திரணவின் கணக்கீட்டை தனது கூற்றுக்கான அடிப்படையாக அருளிங்கம் மேற்கோள் காட்டுவதால் அவரது பதிலை நாங்கள் பத்திரணவின் ஆய்வின் அடிப்படையில் மதிப்பீடு செய்வோம். எங்கள் கணக்கீட்டுடன் நாங்கள் விரிதாள் ஒன்றைப் பிரசுரித்திருந்தோம், அதனை நீங்கள் இங்கே பெறமுடியும். பத்திரணவும் அவரது கணக்கீட்டை ஒரு விரிதாளில் வழங்கியிருந்தார், அதனை நீங்கள் இங்கே பெறமுடியும்.

விவாதத்தின் தொனி எவ்வாறாக இருந்தாலும் நாங்கள் அருளிங்கத்தின் கருத்தை தீவிரமாக எடுத்துக்கொண்டுள்ளோம் என வலியுறுத்துவதன் மூலம் நாங்கள் இதைத் தொடங்க விரும்புகின்றோம். நாங்கள் உண்மைச் சரிபார்ப்பு செய்யும் அனைவரும் சந்தேகத்தின் பலனை பெறத் தகுதியானவர்கள் என்றும், அவர்களின் பதில்கள் கவனமாகக் கையாளப்பட வேண்டும் என்றும் நாங்கள் நம்புகின்றோம். நாங்கள் பத்திரணவின் பங்கேற்பையும் பாராட்டுகின்றோம். அவர் வெறுமனே தனது வாதங்களை மட்டும் முன்வைக்காமல் நாம் ஆராயக்கூடிய வகையில் கணக்கீடுகளையும் வழங்கியுள்ளார். இதன் மூலம் நாங்கள் தெளிவாக எங்கள் பதில்களை வழங்க முடியும்.

பத்திரணவின் ஆய்வை அருளிங்கம் ஏற்றுக்கொள்வதால், அவருடைய வாதங்களுக்கும் கணக்கீடுகளுக்கும் பதிலளிப்பதே எங்கள் உண்மைச் சரிபார்ப்பு மீதான அருளிங்கத்தின் வாதங்களுக்குப் போதுமானது என நாங்கள் கருதுகின்றோம்.

எங்கள் உண்மைச் சரிபார்ப்பில் வட்டி விகிதம் மற்றும் மூலதன மீள்கொடுப்பனவு குறைப்பை கணக்கிடுவதற்கு நாங்கள் பயன்படுத்திய முறை பொருத்தமற்றது எனவும் வேறொரு முறை பயன்படுத்தப்பட வேண்டும் எனவும் பத்திரண வாதிடுகின்றார். அவர் உடன்படாத மூன்று குறிப்பிட்ட விடயங்களை நாங்கள் அடையாளம் கண்டுள்ளோம். இந்தப் பதிலின் இறுதியில் எங்களின் சுருக்கமான பதிலுடன் அவற்றை நாங்கள் தொகுத்து வழங்கியுள்ளோம்.

அருளிங்கத்திற்குப் பதிலளிக்க பத்திரணவின் கருத்து வேறுபாடுகளை ஆராய வேண்டிய அவசியமில்லை. ஏனெனில் கணக்கீட்டு முறைகளில் வேறுபாடுகள் இருந்தாலும் பத்திரணவின் முடிவுகள் எங்கள் உண்மைச் சரிபார்ப்பின் அதே முடிவுகளுக்கே இட்டுச் செல்கின்றன: மறுசீரமைக்கப்பட்ட ஒப்பந்தத்தின் பின்னர் கடனுக்கான மூலதன மீள்கொடுப்பனவு மற்றும் வட்டி விகிதம் ஆகிய இரண்டுமே அதற்கு முன்னர் இருந்த ஒப்பந்தத்தின் நிபந்தனைகளுடன் ஒப்பிடும்போது குறைந்துள்ளன.

இது பத்திரணவின் விரிதாளில் காணப்படுகின்றது: https://t.co/z0nBamQsW9.

• மறுசீரமைப்பிற்கு முன்னதான வட்டி விகிதத்தை 6.95% என செல் E16 கணக்கிடுகின்றது. மறுசீரமைப்பிற்குப் பின்னரான வட்டி விகிதம் (2028 ஆம் ஆண்டு முதல்) 6.81% என செல் B35கணக்கிடுகின்றது. இது மறுசீரமைப்பிற்கு முன்னரான விகிதத்தை விடக் குறைவாகும். 2028 ஆம் ஆண்டுக்கு முன்னர் இருந்து கணக்கிட்டிருந்தால் அவர் மேலும் குறைவான மறுசீரமைப்பிற்கு பின்னரான வட்டி விகிதத்தைப் பெற்றிருப்பார் (ஆனால் இது அவருடைய விரிதாளில் காட்டப்படவில்லை).

• மறுசீரமைப்பிற்கு முன்னரான மூலதன மீள்கொடுப்பனவு ஐ.அ.டொ 14,432 மில்லியன் என செல் E15கணக்கிடுகின்றது. மறுசீரமைப்பிற்குப் பின்னரான மூலதன மீள்கொடுப்பனவு ஐ.அ.டொ 12,278 மில்லியன் என செல் F31 என கணக்கிடுகின்றது. மூலதன மீள்கொடுப்பனவு 14.9 சதவீதத்தால் குறைந்துள்ளது என செல் B36 குறிப்பிடுகின்றது.

பத்திரணவின் முறைகள் (கீழே விளக்கப்பட்டுள்ளன) FactCheck.lk கணக்கீடுகளை விட வட்டி விகிதத்தில் சிறிய குறைப்பையும் மூலதன மீள்கொடுப்பனவில் அதிக குறைப்பையும் காட்டுகின்றன. எனினும் அவரது கணக்கீடுகள் வட்டி விகிதம் மற்றும் மூலதன மீள்கொடுப்பனவு குறைந்துள்ளன என்பதைத் தெளிவாகக் காட்டுகின்றன.

அருளிங்கத்தின் கூற்று எவ்வாறு மதிப்பிடப்பட்டது என்பது தொடர்பில் அவருடைய கவலைகளை இது நிவர்த்தி செய்யும் என நாங்கள் நம்புகின்றோம். அவர் நம்பும் எண்களை அடிப்படையாகக் கொண்ட மதிப்பீடு FactCheck.lkஇன் மதிப்பீடுகளுடன் பொருந்துகின்றது. பெறுமதிகளில் உள்ள வேறுபாடுகள் கீழே விளக்கப்பட்டுள்ளன. எனினும் அவை உண்மைச் சரிபார்ப்பைப் பாதிக்காது.

FactCheck.lk பயன்படுத்தும் முறைகள் குறித்த பத்திரணவின் கருத்து வேறுபாடு தொடர்பான மேலதிக விளக்கம்

 

 

வட்டி விகிதம் மற்றும் மூலதன மீள்கொடுப்பனவில் ஏற்படும் குறைப்பைக் கணக்கிடுவதற்குப் பயன்படுத்தப்பட்ட முறை தவறானது எனவும் வேறொரு முறை பயன்படுத்தப்பட வேண்டும் எனவும் பத்திரண வாதிடுகின்றார். குறிப்பிட்ட கருத்து வேறுபாடுகள் கீழே விவாதிக்கப்பட்டுள்ளன.

பத்திரணவின் கருத்துகள் மற்றும் கணக்கீடுகளில் இருந்து FactCheck.lk இன் அணுகுமுறையுடனான மூன்று முக்கிய முரண்பாடுகளை நாங்கள் அடையாளம் கண்டோம்:

(D1) பயனுள்ள வட்டி விகிதக் கணக்கீடானது வருமான விகிதத்திற்குச் சமமான வட்டி விகிதமாக இருக்கக்கூடாது. அவை கூப்பன்கள் செலுத்தப்படும் மூலதனம் மற்றும் அந்தக் கூப்பன்களின் மீள்கொடுப்பனவுக் காலம் ஆகியவற்றால் நிறையேற்றப்பட சராசரி கூப்பன் கொடுப்பனவுகளாக இருக்க வேண்டும்.

(D2) 2022 முதல் 2024 வரையான காலப்பகுதியில் இலங்கை செலுத்தத் தவறிய வட்டியை மீட்டெடுக்க அறிமுகப்படுத்தப்பட்ட, “செலுத்தத் தவறிய வட்டி” (PDI – past due interest) என அழைக்கப்படும் மறுசீரமைப்பிற்குப் பின்னரான மீள்கொடுப்பனவானது வட்டிக் கொடுப்பனவாகக் கருதப்பட வேண்டும், மூலதனக் கொடுப்பனவாகக் கருதப்படக்கூடாது.

(D3) மீள்கொடுப்பனவு கடமைப்பாடுகளின் இரண்டு கொடுப்பனவுகளையும் ஒப்பிடும்போது மறுசீரமைப்பிற்கு முன்னரான கொடுப்பனவு 2022 ஆம் ஆண்டு முதல் மதிப்பிடப்பட வேண்டும். அதேவேளை மறுசீரமைப்பிற்குப் பின்னரான கொடுப்பனவு 2024 ஆம் ஆண்டு முதல் மதிப்பிடப்பட வேண்டும். மாறாக 2022 ஆம் ஆண்டு முதல் அல்ல.

இந்தக் கருத்து வேறுபாடுகளை FactCheck.lk பின்வருமாறு மதிப்பிடுகின்றது.

(அ) D1 மற்றும் D2 (கருத்து வேறுபாடுகள் 1 மற்றும் 2): பதிலளிப்பவரின் மாற்று அணுகுமுறை இந்தக் கணக்கீடுகளுக்கு ஏற்றுக்கொள்ளக்கூடிய ஒரு முறையைப் பரிந்துரைக்கின்றது என்பதை நாங்கள் ஒப்புக்கொள்கின்றோம். எனினும் இந்த மாற்று முறைகள் பயன்படுத்தப்பட்டதில் கணக்கீட்டுப் பிழைகள் உள்ளதாகத் தெரிகின்றது. இது அவருடைய விரிதாளில் உள்ள முடிவுகளைப் பாதிக்கின்றது. அவ்வாறு தெரிவிப்பதால் இந்தக் கணக்கீடுகளை முன்னெடுப்பதற்கு மாற்று முறைகள் உள்ளன என்பதை நாங்கள் மறுக்கவில்லை. FactCheck.lk கூட அதன் மதிப்பீட்டை பல்வேறு கணக்கீட்டு முறைகளைப் பயன்படுத்தி மதிப்பாய்வு செய்தபோதும், இறுதி பெறுமதிகளை ஒரேயொரு முறையைப் பயன்படுத்தி வெளியிட்டிருந்தது.

(ஆ) D2: வித்தியாசத்தை பின்வருமாறு விளக்கலாம்: PDI என்பது 2022 – 2024 காலப்பகுதியில் செலுத்தப்பட வேண்டிய ஆனால் செலுத்தப்படாத மூலதன வட்டி ஆகும். FactCheck.lk மூலதனமாக்கப்பட்ட கூறை மூலதன மீள்கொடுப்பனவாகவும், அதன் மீதான வட்டியை வட்டிக் கொடுப்பனவாகவும் கருதியது. எனினும் இது 2022 முதல் கடந்த கால வட்டி என்பதால் அந்த மூலதனக் கூறுக்கான மீள்கொடுப்பனவும் வட்டிக் கொடுப்பனவாகக் கருதப்பட வேண்டும் என பத்திரண வாதிடுகின்றார். இந்த இரண்டு முறைகளும் ஏற்றுக்கொள்ளப்படக்கூடியது என நாங்கள் நம்புகின்றோம். FactCheck.lk இன் மூலதனக் குறைப்பான 2.1 சதவீதத்துடன் ஒப்பிடுகையில் பத்திரணவின் கணக்கீடுகள் மூலதனக் குறைப்பில் (14.9%) அதிகமான குறைப்பை ஏன் காட்டுகின்றது என்பதை அவர் பயன்படுத்திய முறை விளக்குகின்றது.

(இ) D3: பத்திரணவின் கருத்துடன் நாங்கள் இரண்டு விடயங்களில் உடன்படவில்லை. முதலாவது, நியாயமான ஒப்பீட்டிற்காக இரண்டு கொடுப்பனவு முறைகளும் ஒரே திகதியில் இருந்து தொடங்கப்பட வேண்டும். இரண்டாவது, பத்திரண செய்தது போல, PDI ஐ 2022 – 2024க்கான வட்டிக் கொடுப்பனவுகளாகக் கருதுவது முரணானது என நாங்கள் எண்ணுகின்றோம். அதே நேரம் கொடுப்பனவு கடமைப்பாடுகள் 2022 ஆம் ஆண்டில் ஆரம்பிக்கப்படவில்லை என்பதை வலியுறுத்துகின்றோம்.

எனினும் முன்னர் குறிப்பிட்டது போன்று இந்தக் கருத்து வேறுபாடுகள் (D1 – D3) எதுவும் FactCheck.lk இன் முடிவை (அல்லது தீர்ப்பை) பாதிக்காது. ஏனெனில் பத்திரணவின் கணக்கீடுகளும் அதே இறுதி முடிவுகளுக்கே இட்டுச் செல்கின்றன.