Statement

“2018 මහා බැංකු වාර්තාවට අනුව මුළු ආදායම රුපියල් බිලියන 1,920 ක් වෙනකොට ඒ වසරේ ණය පොලී වාරිකය රුපියල් බිලියන 2,088 ක් වුණා. බිලියන 168 ක හිඟයක් තිබුණා.”

Fact check

පාර්ලිමේන්තු මන්ත්‍රී විජිත හේරත් විසින් සමස්ත ණය පොළී වාරිකය වරදවා ඉදිරිපත් කරයි

2019 මැයි 28 දින දිවයින පුවත්පත මගින් පාර්ලිමේන්තු මන්ත්‍රී විජිත හේරත් විසින් පහත දැක්වෙන ප්‍රකාශය සිදුකළ බවට වාර්තා කොට තිබිණි:

2018 වසරේ රජයේ සමස්ත ආදායම රුපියල් බිලියන 1,920 ක් වන විට, ණය පොලී වාරිකය රුපියල් බිලියන 2,088 ක් වී ඇති අතර, එය රුපියල් බිලියන 168 කින් රජයේ ආදායම අතික්‍රමණය කොට තිබිණි.

2018 වසරේ ශ්‍රී ලංකා මහ බැංකු (CBSL) වාර්ෂික වාර්තාව මගින් පහත දැක්වෙන තාවකාලික ඇස්තමේන්තු ඉදිරිපත් කරයි: 2018 වසර සඳහා රජයේ සමස්ත ආදායම රුපියල් බිලියන 1,919.973 ක් (නිමානය කළ විට රුපියල් බිලියන 1,920 ක්) වේ. සම්පූර්ණ ණය පොලී වාරිකය රුපියල් බිලියන 852.19 ක් වේ.

ණය පොලී වාරිකයන් සම්බන්ධයෙන් තම මතය ඉදිරිපත් කිරීමේදී පාර්ලිමේන්තු මන්ත්‍රී විජිත හේරත් විසින් 2018 වසරේ රජයේ සමස්ත ආදායම නිවැරදිව දක්වා ඇත. එය එසේ වුවත් සමස්ත ණය පොලී වාරිකය ලෙසින් ඔහු ඉදිරිපත් කළ රුපියල් බිලියන 2,088 ක සංඛ්‍යාව, නිවැරදි ණය පොලී වාරිකය වන රුපියල් බිලියන 852 ක සංඛ්‍යාවෙන් විශාල වශයෙන් වෙනස්ව ඇත. එසේම මෙහි අරුත වන්නේ පාර්ලිමේන්තු මන්ත්‍රීවරයා ප්‍රකාශ කළ මතයට ප්‍රතිවිරුද්ධ ලෙසින් සමස්ත ණය පොලී වාරිකය, සම්පූර්ණ ආදායම වන රුපියල් බිලියන 1,068 ට වඩා අඩු වනවාක් මෙන්ම, රුපියල් බිලියන 168 ක හිඟයක්ද නොපවතින බවයි.

එනිසා අප විසින් පාර්ලිමේන්තු මන්ත්‍රී විජිත හේරත්ගේ ප්‍රකාශය සාවද්‍ය යැයි කාණ්ඩගත කරමු.

*FactCheck හි විනිශ්චය පාදක වී ඇත්තේ පොදු ජනයාට ප්‍රවේශ විය හැකි, වඩාත්ම යාවත්කාලීන තොරතුරු මතයි. අපගේ සෑම කරුණු සොයා බැලීමකදීම වෙනත් නව තොරතුරු අනාවරණය වන්නේ නම්, FactCheck හි මෙම ඇගයීමද නිසි ලෙස යාවත්කාලීන කිරීමට අප සුදානම්.

අමතර තොරතුරු

පාර්ලිමේන්තු මන්ත්‍රීවරයා විසින් ප්‍රකාශ කරනු ලැබූ රුපියල් බිලියන 2,088 ක සංඛ්‍යාව වෙත ඔහු එළැඹී ඇත්තේ, සම්පූර්ණ ණය මුදලේ 2018 වසර සඳහා ගෙවිය යුතු කොටස වන රුපියල් බිලියන 1,236 ක මුදලද සමස්ත ණය පොලී වාරිකයට එකතු කිරීම මගිනි. කෙසේ වුවත් සම්පූර්ණ ණය මුදලෙන් ගෙවිය යුතු කොටස, ණය මුදලේ පොලිය ලෙසින් රජයට කරන්නට සිදුවන වියදම නොවේ. ලබාගත් ණය මුදලක නැවත ගෙවන කොටසින් ණය පොලී වාරිකය වෙන්ව පවතින බව ජාත්‍යන්තර මූල්‍ය අරමුදලේ (IMF) 2014 වසරේ රාජ්‍ය මූල්‍ය සංඛ්‍යාලේඛන අත්පොතේ 4.24 කොටස මගින් පැහැදිලිවම දක්වා ඇත. උදාහරණ ලෙසින් දක්වන්නේ නම් ණය පොලී වාරිකයන් රජයේ වියදමක් ලෙසින් සැලකෙන නමුත්, ණය මුදලින් ගෙවීමට සිදුවන කොටස වියදමක් ලෙසින් නොසැලකේ. පාර්ලිමේන්තු මන්ත්‍රීවරයා විසින් තම ප්‍රකාශයේ සඳහන් කර තිබෙන්නේ ණය පොලී වාරිකය සම්බන්ධයෙන් මිස ණය මුදලින් ගෙවිය යුතු කොටස් වාරිකයේ සහ ණය පොලී වාරිකයේ එකතුව සම්බන්ධයෙන් නොවේ. මෙනිසා ඔහු සිය මතය ඉදිරිපත් කිරීමේදී කරුණු වරදවා ඉදිරිපත් කොට ඇත.